Surah AN-noor

Para 18 

Surrah 24

  Surah AN-noor

ALLAH K NAAM SY SHUROO JO BOHUT MEHRBAN NEHAYAT REHEM FARMANY WALA HY

1.    (Ye) aik (Azeem) Soorat hy jisy Ham ny utaara hy aur Ham ny is (k ahkaam) ko Farz kr dia hy aur Ham ny is meiñ waazeh Aayateñ naazal farmai heñ ta k tum naseehat haasil kro¤

2.    Bd-kaar aurat aur bd-kaar mard (aggar ghair shadi-shudda hoñ) to on donoñ meiñ sy har aik ko (Sharaet-e-Hadd k saath jurm-e-Zanaa k saabit ho jany par) so (so) Korhy maaro (ye khitaab hukkaam ko hy. Mard ko korhy lgany k waqt kharha kia jaey aur us k tmaam kaprhy utaar diye jaeñ siwa tehband k aur us k tmaam baddan par korhy lgaey jaeñ siwaey sar, chehry aur sharm-gaah k. Aurat ko korhy lgany k waqt na kharha kia jaey na us k kaprhy utaary jaeñ jab k shadi-shudda mard-o-aurat ki bd-kaari par sazaa Rajjam hy aur ye Sazaa-e-Mot hy. Lawaatat sy Hadd Waajib naheeñ hoti) aur tumheñ on donoñ par (Deen k Hukam k ijraa) meiñ zarraa tars naheeñ aana chahye aggar tum Allah par aur Aakhirat k Din par Emaan rakhty ho, aur chahye k on donoñ ki sazaa (k moqa') par Musalmanoñ ki (aik ach'chhi khaasi) jama'at mojood ho¤

3.    Bd-kaar mard siwaey bd-kaar aurat ya Mushrik aurat k (kisi pakeeza aurat sy) Nikaah (krna pasand) naheeñ krta aur bd-kaar aurat (bhi) siwaey bd-kaar mard ya Mushrik k (kisi Saaleh shakhs sy) Nikaah (krna pasand) naheeñ krti (q k Khabees ka mailaan Khabees he ki tarraf hota hy aur Naikoñ ko Khabeesoñ ki tarraf raghbat naheeñ hoti. Muhaajreen meiñ baaz bilkul naadaar thy na on k paas kuchh maal tha na on ka koi azeez qreeb tha aur bd-kaar aurateñ dolat-mand aur maaldaar theeñ. Ye daikh kr kisi Muhaajar ko kheyaal aaya k aggar on auratoñ sy Nikaah kr lia jaey to on ki dolat kaam meiñ aey gi. Sayyad-e-Aalam s.a.w.w sy onhoñ ny ijaazat chahi is par ye Aayat-e-Karima naazal hui aur onheñ is sy rok dia gea), aur ye (yani Fail-e-Zanaa) Musalmanoñ par haraam kr dia gea hy¤

4.    Aur jo log paak-daaman auratoñ par (bd-kaari ki) tuhmat lgaeñ phir chaar (4) gawaah paish na kr sakkeñ to tum onheñ (Sazaa-e-Qazzaf k tor par) assi (80) korhy lgao (Hadd-e-Qazzaf mutaalba par mashroot hy. Jis par tuhmat lgai gai hy aggar wo mutaalba na kry to Qazi par Hadd qaem krna laazim naheeñ. Mutaalba ka haq usi ko hy jis par tuhmat lgai gai hy. Aggar wo marr gea ho to us k baity poty ko bhi mutaalba ka haq haasil hy) aur kabhi bhi on ki gawaahi qabool na kro (jo Zanaa ki tuhmat meiñ sazaa-yaab hoñ. Aisy logoñ ko Mardoodush-shahaada kehty heñ), aur yehi bd-kaar log heñ¤

5.    Siwaey on k jinhoñ ny us (tuhmat lgany) k baad Toba kr li aur (apni) islaah kr li to baishak Allah barha bakhshny wala nehaayat Mehrban hy (on ka shumaar Faasiqoñ meiñ naheeñ ho ga maggar is sy Hadd-e-Qazzaf muaaf naheeñ ho gi)¤

6.    Aur jo log apni biviyoñ par (bd-kaari yani Zanaa ki) tuhmat lgaeñ aur on k paas siwaey apni zaat k koi gawaah na hoñ to aisy kisi bhi aik shakhs ki gawaahi ye hy k (wo khud) chaar (4) martba Allah ki Qassam kha kr gawaahi dy k wo (ilzaam lgany meiñ) sach'cha hy¤

7.    Aur paañchveeñ martba ye (kahy) k us par Allah ki Laanat ho aggar wo jhoota ho (is ko La'aan kehty heñ. Jab mard apni bivi par Zanaa ki tuhmat lgaey to aggar mard-o-aurat donoñ Shahaadat k ehl hoñ aur aurat is par mutaalba kry to mard par La'aan Waajib ho jata hy. Aggar wo La'aan sy inkaar kry to us ko us waqt tak qaid meiñ rak'kha jaey ga jab tak wo La'aan kry ya apny jhoot ka iqraar kry. Aggar jhoot ka iqraar kry to us ko Sazaa-e-Qazzaf k tor par  80 korhy lgaey jaeñ gy. Aggar La'aan kry to us par sy Hadd-e-Qazzaf saaqat ho jaey gi)¤

8.    Aur (isi tarrah) ye baat us (aurat) sy (bhi) sazaa ko taal sakti hy (jis par us k shohar ny Zanaa ki tuhmat lgai ho) k wo chaar (4) martba Allah ki Qassam kha kr (khud) gawaahi dy k wo (mard us tuhmat k lgany meiñ) jhoota hy¤

9.    Aur paañchveeñ martba ye (kahy) k us par (yani mujh par) Allah ka ghazzab ho aggar ye (mard is ilzaam lgany meiñ) sach'cha ho (mard k La'aan k baad aurat par La'aan Waajib ho ga, inkaar kry gi to qaid ki jaey gi yahaañ tak k La'aan manzoor kry ya shohar k ilzaam ki tasdeeq kry. Aggar tasdeeq kry to us par Zanaa ki Hadd lgai jaey gi aur aggar La'aan kry to us sy Zanaa ki Hadd saaqat ho jaey gi)¤

10.                 Aur aggar tum par Allah ka Fazzal aur Us ki Rehmat na hoti (to tum aisy haalaat meiñ zeyaada praishaan hoty) aur baishak Allah barha he toba qabool farmany wala barhi Hikmat wala hy¤

11.                 Baishak jin logoñ ny (Ayesha Siddiqa Tayyaba Tahira R.A par) buhtaan lgaya tha (wo bhi) tum he meiñ sy aik jama'at the (5 Hijri meiñ Ghazwa-e-Banni-Al-Mustaliq sy waapsi k waqt qaafla qreeb-e-Madina aik parhao par thehra to Ayesha R.A zaroorat k liye kisi gosha meiñ tashreef ly gaeeñ wahaañ Aap R.A ka haar toot gea. Us ki tlaash meiñ masroof ho gaeeñ. Idhar qaafla ny kooch kia aur Aap R.A ka mahmal shareef ooñt par kass dia aur onheñ yehi kheyaal raha k Aap R.A us meiñ heñ. Qaafla chall dia. Aap R.A aa kr qaafla ki jagga baith gaeeñ aur Aap R.A ny kheyaal kia k Meri tlaash meiñ qaafla zaroor waapas ho ga. Qaafla k peechhy girri parhi cheez uthany k liye aik saahab raha krty thy, us moqa' par Hazrat Safwaan R.A is kaam par thy. Jab wo aaey to Aap R.A ko daikh kr onhoñ ny apni ooñtni bithai, Aap R.A us ooñtni par sawaar ho kr lashkar meiñ pohncheeñ. Munaafiqeen ny ohaam-e-faasid phailaey aur Aap R.A ki Shaan meiñ bd-goi shuroo ki), tum is (buhtaan k waqea) ko apny haqq meiñ bura matt samjho balky wo tumhary haq meiñ behtar (ho gea) hy (q k tumheñ isi hwaly sy Ahkaam-e-Sharee'at mil gaey aur Ayesha Siddiqa Tayyaba Tahira R.A ki Paak-Daamni ka Gawaah khud Allah bann gea jis sy tumheñ On ki Shaan ka patta chall gea), on (Munaafiqeen) meiñ sy har aik k liye utna he gunaah hy jitna us ny kmaya (yani ba-qaddar us k ammal k, kisi ny toofaan uthaya kisi ny buhtaan uthany waly ki zubani mawaafqat ki koi hañs dia kisi ny khamoshi k saath sun he lia, jis ny jo kia us ka badla paey ga), aur on meiñ sy jis ny is (buhtaan) meiñ sb sy zeyaada hissa lia (k apny dil sy ye toofaan garha aur wo Abdullah-bin-Ubai-bin-Salool hy) us k liye zabbar-dast azaab hy¤

12.                  Aisa q na huwa k jab tum ny us (buhtaan) ko suna tha (jo Ayesha Siddiqa R.A par lgaya gea tha) to Momin mard aur Momin aurateñ apnoñ k bary meiñ naik gumaan kr laity aur (ye) keh daity k ye khulla (jhoot par mabni) buhtaan hy (Musalmaan ko yehi hukam hy k Musalmaan k saath naik gumaan kry. Baaz gumrah bay-baak ye kehty heñ k Sayyad-e-Aalam s.a.w.w ko MA'AAZALLAH is muaamla meiñ bd-gumaani ho gai the. Allah Momineen sy farmata hy k tum ny naik gumaan q na kia to ye kaisy mumkin hy k Rasool-e-Akram s.a.w.w bd-gumaani krty)¤

13.                 Ye (iftraa pardaaz log) is (toofaan) par chaar (4) gawaah q na laey, phir jab wo gawaah naheeñ la sakky to yehi log Allah k nazdeek jhooty heñ (chunañchy buhtaan lgany waloñ par ba-Hukm-e-Rasool s.a.w.w Hadd qaem ki gai aur assi assi korhy lgaey gaey)¤

14.   Aur aggar tum par dunia-o-Aakhirat meiñ Allah ka Fazzal aur Us ki Rehmat na hoti (dunia meiñ toba k liye muhlat daina aur Aakhirat meiñ afw-o-darguzar farmana) to jis (tuhmat k) charchy meiñ tum parh gaey ho us par tumheñ zabbar-dast azaab pohnchta¤

15.  Jab tum us (baat) ko (yani us buhtaan ko jo Ayesha Siddiqa R.A par lgaya gea,  aik dusry sy sun kr) apni zubanoñ par laty rahy aur apny mooñh sy wo kuchh kehty rahy jis ka (khud) tumheñ koi ilm he na tha aur is (charchy) ko ma'mooli baat kheyaal kr rahy thy (aur ye sammajh rahy thy k is meiñ barha gunaah naheeñ), halaañky wo Allah k hazoor bohut barhi (jasaarat ho rahi) the (aur jurm-e-azeem tha)¤

16.  Aur jab tum ny ye (buhtaan) suna tha to tum ny (usi waqt) ye q na keh dia k hmary liye ye (jaez he) naheeñ k ham isy zubaan par ly aeñ (balky tum ye kehty k Ay Allah) Tu Paak hy (is baat sy k aisi aurat ko Apny Habib-e-Mukarram s.a.w.w ki Mehboob Zoja bna dy) ye bohut barha buhtaan hy (Ye mumkin he naheeñ k kisi Nabi ki Bibi bd-kaar ho agarchy us ka mubtlaey Kufr hona mumkin hy q k Añmbiyaa a.s Kuffaar ki tarraf mab'oos hoty heñ to laazim hy k jo cheez Kuffaar k nazdeek bhi qaabil-e-nafrat ho us sy wo paak hoñ aur zaahir hy k aurat ki bd-kaari on k nazdeek bhi qaabil-e-nafrat hy)¤

17.  Allah tum ko naseehat farmata hy k phir kabhi bhi aisi baat (umr bhr) na krna aggar tum Ehl-e-Emaan ho¤

18.   Aur Allah tumhary liye Aayatoñ ko waazeh tor par beyaan farmata hy, aur Allah khoob jaan'ny wala barhi Hikmat wala hy¤

19.  Baishak jo log is baat ko pasand krty heñ k Musalmanoñ meiñ bay-hayaai phaily on k liye dunia aur Aakhirat meiñ dard-naak azaab hy (dunia meiñ on par Hadd qaem ki jaey gi jaisy ibn-e-Ubai aur Hassaan aur Mistah par Hadd qaem ki gai aur aggar bay-toba marr jaeñ to Aakhirat meiñ on k liye Dozakh hy), aur Allah (aisy logoñ k azaaem ko) jaanta hy aur tum naheeñ jaanty¤

20.  Aur aggar tum par (Us Rasool-e-Mukarram s.a.w.w k sadqa meiñ) Allah ka Fazzal aur Us ki Rehmat na hoti to (tum bhi pehli Ummatoñ ki tarrah tabaah kr diye jaty) maggar Allah barha Shafeeq barha Rehem farmany wala hy¤

21.  Ay Emaan walo! Shetan k raastoñ par na challo (aur buhtaan uthany waloñ ki baatoñ par kaan na lgao), aur jo shakhs Shetan k raastoñ par chalta hy to wo yaqinan bay-hayaai aur bury kaamoñ (k frogh) ka hukam daita hy, aur aggar tum par Allah ka Fazzal aur Us ki Rehmat na hoti to tum meiñ sy koi shakhs bhi kabhi (is gunaah-e-tuhmat k daagh sy) paak na ho sakta (aur Allah us ko toba-o-husn-e-ammal ki tofeeq na daita) laikin Allah jisy chaahta hy (us ki toba qabool farma kr usy) paak farma daita hy, aur Allah khoob sun'ny wala jaan'ny wala hy¤

22.  Aur tum meiñ sy (Deeni) buzurgi waly aur (duniyavi) kashaesh waly (ab) is baat ki qassam na khaeñ k wo (is buhtaan k jurm meiñ shareek) rishta-daaroñ aur muhtajoñ aur Allah ki Raah meiñ Hijrat krny waloñ ko (maali imdaad na) deñ gy (Mistah Abu Bakr R.A k khala-zaad thy aur bohut naadaar thy. Abu Bakr R.A he on ka kharch uthaty thy. Ayesha Siddiqa R.A par tuhmat lgany waloñ k saath onhoñ ny mawaafqat ki the, is par Abu Bakr R.A ny qassam khai k Mistah ki maddad na kreñ gy) onheñ chaahye k (on ka qasoor) muaaf kr deñ aur (on ki ghalti sy) darguzzar kreñ, kia tum is baat ko pasand naheeñ krty k Allah tumheñ bakhsh dy, aur Allah barha bakhshny wala Mehrban hy (Ye Aayat sun kr Abu Bakr R.A ny kaha k baishak meri aarzoo hy k Allah meri maghfirat kry so maiñ Mistah ki jo maddad krta tha us ko jari rak'khoñ ga)¤

23.   Baishak jo log on paarsa Momin aurtoñ par jo (burai k tasawwar sy bhi) bay-khabbar aur na-aashna heñ (aisi) tuhmat lgaty heñ wo dunia aur Aakhirat (donoñ jahaanoñ) meiñ mal'oon heñ aur on k liye zabbar-dast azaab hy¤

24.  Jis din (yani Roz-e-Qeyaamat khud) on ki zubaneñ aur on k haath aur on k paoñ onhi k khilaaf gawaahi deñ gy k jo kuchh wo krty rahy thy¤

25.  Us din Allah onheñ on (k aa'maal) ki poori poori jazaa jis k wo sahi haqdaar heñ dy dy ga aur wo jaan leñ gy k Allah (khud bhi) Haq hy (aur haq ko) zaahir farmany wala (bhi) hy (Quran meiñ kisi gunaah par aisi taghleez-o-tashdeed aur takraar-o-takeed naheeñ farmai gai jaisi k Ayesha Siddiqa R.A par buhtaan baandhny par farmai gai. Is sy Sayyad-e-Aalam s.a.w.w ki wuq'at-o-manzilat zaahir hoti hy)¤

26.  Na-paak aurteñ na-paak mardoñ k liye (makhsoos) heñ aur pleed mard pleed aurtoñ k liye heñ, aur (isi tarrah) paak-o-tayyab aurteñ pakeeza mardoñ k liye (makhsoos) heñ aur paak-o-tayyab mard pakeeza aurtoñ k liye heñ (so tum  Rasoolullah s.a.w.w ki Pakeezgi-o-Tahaarat ko daikh kr khud soch laity k Allah ny On k liye Zoja bhi kis qaddar Pakeeza-o-Tayyab bnai ho gi), Ye (Pakeeza Log) on (tuhmatoñ) sy kuliyyatan barri heñ jo ye (bd-zubaan) log keh rahy heñ, On (Pakeeza Logoñ) k liye (to) bakhshaesh aur izzat-o-Buzurgi wali ataa (muqaddar ho chukki) hy (tum On ki Shaan meiñ zubaan-drazi kr k q apna mooñh kala aur apni Aakhirat tabaah-o-barbaad krty ho)¤

27.  Ay Emaan walo! Apny gharroñ k siwa dusry gharroñ meiñ daakhil na huwa kro, yahaañ tak k tum on sy ijaazat ly lo aur on k rehny waloñ ko (daakhil hoty he) Salaam kaha kro, ye tumhary liye behtar (naseehat) hy ta k tum (Us ki Hikmatoñ meiñ) ghor-o-fikr kro¤

28.  Phir aggar tum on (gharroñ) meiñ kisi shakhs ko mojood na pao to tum on k andar matt jaya kro yahaañ tak k tumheñ (is baat ki) ijaazat di jaey aur aggar tum sy kaha jaey k waapas chally jao to tum waapas pallat jaya kro, ye tumhary haq meiñ barhi pakeeza baat hy, aur Allah on kaamoñ sy jo tum krty ho khoob aagaah hy¤

29.  Is meiñ tum par gunaah naheeñ k tum on makaanaat (o-imaaraat) meiñ jo kisi ki mustaqil rehaesh-gaah naheeñ heñ (maslan hotel, sraey aur musaafir-khany waghaira meiñ baghair ijaazat k) chally jao (k) in meiñ tumheñ faeda uthany ka haq (haasil) hy, aur Allah on (sb baatoñ) ko jaanta hy jo tum zaahir krty ho aur jo tum chhupaty ho¤

30.  Aap (s.a.w.w) Momin mardoñ sy farma deñ k wo apni nigaheñ neechi rak'kha kreñ (aur jis cheez ka daikhna jaez naheeñ us par nazzar na daleñ) aur apni sharm-gahoñ ki hifaazat kia kreñ, ye on k liye barhi pakeeza baat hy, baishak Allah on kaamoñ sy khoob aagaah hy jo ye anjaam dy rahy heñ¤

31.  Aur Aap (s.a.w.w) Momin aurtoñ sy farma deñ k wo (bhi) apni nigaheñ neechi rak'kha kreñ (aur ghair-mardoñ ko na daikheñ) aur apni sharm-gahoñ ki hifaazat kia kreñ (aur znaa-o-hraam sy bach'cheñ) aur apni aaraesh-o-zaibaesh ko zaahir na kia kreñ siwaey (usi hissa) k jo us meiñ sy khud zaahir hota hy aur wo apny sarroñ par aurhy huwy dopatty (aur chaadreñ) apny graibanoñ aur seenoñ par (bhi) daly raha kreñ aur wo apny bnao siñggaar ko (kisi par) zaahir na kia kreñ siwaey apny shohroñ k ya apny baap-dada ya apny shohroñ k baap-dada k (k wo bhi mehram ho jaty heñ) ya apny baitoñ (aur onheeñ k hukam meiñ hy on ki olaad) ya apny shohroñ k baitoñ k (k wo bhi mehram ho gaey) ya apny bhaiyoñ ya apny bhateejoñ ya apny bhaañjoñ k (aur onheeñ k hukam meiñ heñ chach'cha, mamu waghaira) ya apni (ham-maz'hab, Musalmaan) aurtoñ ya apni mamlooka baandiyoñ k ya mardoñ meiñ sy wo khidmat-gaar jo (itny boorhy hoñ k) khwahesh-o-shahwat sy khali hoñ ya wo (na-baaligh) bach'chy jo (km-sinni k baes abhi) aurtoñ ki parda wali cheezoñ sy aagaah naheeñ huwy (ye bhi mustasna heñ. In par apna siñggaar zaahir krna mam'noo' naheeñ) aur na (chalty huwy) apny paoñ (zmeen par is tarrah) maara kreñ k (pairoñ ki jhañkkaar sy) on ka wo siñgghaar maa'loom ho jaey jisy wo (Hukm-e-Sharee'at sy) posheeda kiye huwy heñ (is liye chaahye k aurteñ bajy-daar jhaañjhan na pehneñ), aur tum sb k sb Allah k hazoor toba kro ay Momino! Ta k tum (on Ah'kaam par ammal paira ho kr) flaah pa jao¤

32.  Aur tum apny mardoñ aur aurtoñ meiñ sy on ka Nikaah kr dia kro jo (umr-e-Nikaah k bawjood) baghair azdwaji zindagi k (reh rahy) hoñ aur apny ba-slaahiyat ghulamoñ aur baandiyoñ ka bhi (Nikaah kr dia kro), aggar wo muhtaaj hoñ gy (to) Allah Apny Fazzal sy onheñ ghanni kr dy ga, aur Allah barhi Wus'at wala barhy ilm wala hy¤

33.  Aur aisy logoñ ko Paak-daamni ikhteyaar krna chaahye jo Nikaah (ki istata'at) naheeñ paty yahaañ tak k Allah onheñ Apny Fazzal sy ghanni farma dy, aur tumhary zair-e-dast (ghulamoñ aur baandiyoñ) meiñ sy jo makaatib (kuchh maal kmaa kr dainy ki shart par aazaad) hona chaheñ to onheñ Makaatib (mazkoora shart par aazaad) kr do aggar tum on meiñ bhlai jaanty ho, aur tum (khud bhi) onheñ Allah k maal meiñ sy (aazaad hony k liye) dy do jo Us ny tumheñ ataa farmaya hy, aur tum apni baandiyoñ ko duniyavi zindagi ka faeda haasil krny k liye bd-kaari par majboor na kro jab k wo paak-daaman (ya hifaazat-e-Nikaah meiñ) rehna chaahti heñ, aur jo shakhs onheñ majboor kry ga to Allah on k majboor ho jany k baad (bhi) barha bakhshny wala Mehrban hy¤

34.  Aur baishak Ham ny tumhari tarraf waazeh aur Roshan Aayateñ naazal farmai heñ (jinhoñ ny Halaal-o-Haraam, Hadood-o-Ahkaam sb ko waazeh kr dia) aur kuchh on logoñ ki misaaleñ (yani qissa-e-Ayesha Siddiqa R.A ki tarrah qissa-e-Mar'yam A.S aur qissa-e-Yousuf A.S) jo tum sy pehly guzzar chukky heñ aur (ye) par'haiz-gaaroñ k liye naseehat hy¤

35.   Allah Aasmanoñ aur Zmeen ka Noor hy Us k Noor ki Misaal (Jo Noor-e-Muhammadi s.a.w.w ki Shakkal meiñ Dunia meiñ Roshan hy) Us Taaq (Numa Seena-e-Aqdas) jaisi hy Jis meiñ Charaagh (e-Nabuwwat Roshan) hy; (Wo) Charaagh, Fanoos (yani Qalb-e-Muhammadi s.a.w.w) meiñ rak'kha hy. (Ye) Fanoos (Noor-e-Elahi k parto sy is qaddar Munawwar hy) goya Aik Drakhshanda Sitara hy (Ye Charaagh-e-Nabuwwat) Jo Zaitoon k Mubarak Drakht sy (yani Aalam-e-Aqdas k Ba-Barkat Raabta-e-Wahi sy ya Añmbiyaa-o-Rusul a.s k Mubarak Shajra-e-Nabuwwat sy) Roshan huwa hy na (faqqat) Sharqi hy aur na Gharbi (balky Apny Faiz-e-Noor ki Wus'at meiñ Aalam-Geer hy). Aisa ma'loom hota hy k is ka Tail (Khud he) Chammak raha hy agarchy abhi isy (Wahi-e-Rabbaani aur Mo'jizaat-e-Aasmani ki) Aag ny chhuwwa bhi naheeñ (Wo) Noor k oopar Noor hy (yani Noor-e-Wajood par Noor-e-Nabuwwat goya Wo Zaat Duhry Noor ka Paikar hy), Allah jisy chaahta hy Apny Noor (ki Maarfat) tak pohncha daita hy, aur Allah logoñ (ki Hadaayat) k liye misaaleñ beyaan farmata hy, aur Allah har cheez sy khoob aagaah hy¤

36.  (Allah ka Ye Noor) Aisy Gharroñ (Masaajid aur Mraakaz) meiñ (mu'yassar aata hy) jin (ki qadr-o-manzilat) k buland kiye jany aur jin meiñ Allah k Naam ka Zikr kiye jany ka Hukam Allah ny dia hy (Ye Wo Ghr heñ k Allah Waly) in meiñ subah-o-shaam Us ki Tasbeeh krty heñ¤

37.  (Allah k is Noor k haamil) wohi Mardaan (e-Khuda) heñ jinheñ tijaarat aur khreed-o-frokht na Allah ki Yaad sy ghaafil krti hy aur na Namaz qaem krny sy aur na Zakaat adaa krny sy (balky duniyavi fraez ki adaegi k doraan bhi) wo (hamma-waqt) us Din sy darty rehty heñ jis meiñ (khof k baes) dil aur aañkheñ (sb) ullat pallat ho jaeñ gi¤

38.  Ta k Allah onheñ on (Naik) Aa'maal ka behtar badla dy jo onhoñ ny kiye heñ aur Apny Fazzal sy onheñ aur (bhi) zeyaada (ataa) farma dy aur Allah jisy chaahta hy baghair hisaab k rizq (o-ataa) sy nawaazta hy¤

39.  Aur Kaafiroñ k aa'maal chatt'yal maidaan meiñ sraab ki maanind heñ jis ko payaasa pani samajhta hy yahaañ tak k jab us k paas aata hy to usy kuchh (bhi) naheeñ pata (isi tarrah us ny Aakhirat meiñ) Allah ko apny paas paya (aur samjha k Allah usy us ki naikiyoñ ka sawaab dy ga) maggar Allah ny us ka poora hisaab (dunia meiñ he) chukaa dia tha, aur Allah jald hisaab krny wala hy¤

40.  Ya (Kaafiroñ k aa'maal) us gehry samundar ki taarikiyoñ ki maanind heñ jisy moj ny dhaañmpa huwa ho (phir) us k oopar aik aur moj ho (aur) us k oopar baadal hoñ (ye teh-darr-teh) taarikiyañ aik dusry k oopar heñ, jab (aisy tareek samundar meiñ doobny wala koi shakhs) apna haath baahir nikaaly to usy (koi bhi) daikh na sakky, aur jis k liye Allah he ny Noor (e-Hadaayat) naheeñ bnaya to us k liye (kaheeñ bhi) Noor naheeñ hota¤

41.  Kia tum ny naheeñ daikha k jo koi bhi aasmanoñ aur zmeen meiñ hy wo (sb) Allah he ki Tasbeeh krty heñ aur prindy (bhi aasmaan-o-zmeen k darmeyaan fizaoñ meiñ) par phailaey huwy (Usi ki Tasbeeh krty heñ), har aik (Allah k hazoor) apni Namaz aur apni Tasbeeh ko jaanta hy, aur Allah on kamoñ sy khoob aagaah hy jo wo anjaam daity heñ¤

42.  Aur sary aasmanoñ aur zmeen ki Hukmrani Allah he ki hy, aur sb ko Usi ki tarraf lot kr jana hy¤

43.  Kia tum ny naheeñ daikha k Allah he baadal ko (pehly) aahista aahista chlata hy phir us (k mukhtlif tuk'rhoñ) ko aapas meiñ mila daita hy phir usy teh-ba-teh bna daita hy phir tum daikhty ho k us k darmeyaan khali jag'hoñ sy barish nikkal kr brasti hy, aur Wo usi aasmaan (yani fiza) meiñ barfani pahaarhoñ ki tarrah (dikhai dainy waly) baadloñ meiñ sy oly  barsaata hy, phir jis par chaahta hy on oloñ ko girata hy aur jis sy chaahta hy on ko phair daita hy (mzeed ye k onhi baadloñ sy bijli bhi paida krta hy), yooñ lagta hy k us (baadal) ki bijli ki chammak aañkhoñ (ko khaira kr k on) ki beenai uch'chak ly jaey gi¤

44.  Aur Allah raat aur din ko (aik dusry k oopar) pallat'ta rehta hy (k raat k baad din aata hy aur din k baad raat), aur baishak is meiñ aql-o-baseerat waloñ k liye (barhi) rehnumai hy¤

45.  Aur Allah ny har aik chalny phirny waly (jaan-daar) ki paidaesh (ki keemiyai ibtda) pani sy farmai (aur pani in sb ki assal hy aur ye sb bawjood muttahid-ul-assal hony k baaham kis qaddar mukhtlif-ul-haal heñ. Ye sb Khaaliq-e-Aalam k Kamaal-e-Qudrat ki Roshan dleel hy), phir on meiñ sy baaz wo huwy jo apny pait k bal chalty heñ (jaisy saañmp aur keerhy) aur on meiñ sy baaz wo huwy jo 2 paoñ par chalty heñ (jaisy aadmi aur prind), aur on meiñ sy baaz wo huwy jo 4 (pairoñ) par chalty heñ (jaisy drindy), Allah jo chaahta hy paida farmata rehta hy, baishak Allah har cheez par barha Qaadir hy¤

46.  Yaqinan Ham ny waazeh aur Roshan beyaan wali Aayateñ naazal farmai heñ, aur Allah (on k zarriye) jisy chaahta hy seedhi raah ki tarraf hadaayat farma daita hy¤

47.  Aur wo (log) kehty heñ k ham Allah par aur Rasool (s.a.w.w) par Emaan ly aey heñ aur ata'at krty heñ phir us (qol) k baad on meiñ sy aik groh (apny iqraar sy) roo-gardani krta hy, aur ye log (haqiqat meiñ) Momin (he) naheeñ heñ (balky Munaafiq heñ)¤

48.  Aur jab on logoñ ko (kisi mu'aamla meiñ) Allah aur Us k Rasool (s.a.w.w) ki tarraf bulaya jata hy k Wo on k darmeyaan faisla farma dy to us waqt on meiñ sy aik groh (Darbaar-e-Risaalat s.a.w.w meiñ aany sy) guraizaañ hota hy¤

49.  Aur aggar wo haq waly hoty to wo Us (Rasool s.a.w.w) ki tarraf mutee' ho kr taizi sy chally aaty¤

50.  Kia on k dilloñ meiñ (Munaafiqat ki) bimari hy ya wo (Shaan-e-Risaalat s.a.w.w meiñ) shakk krty heñ ya wo is baat ka andaisha rakhty heñ k Allah aur Us k Rasool (s.a.w.w) on par zulm kreñ gy, (naheeñ) balky wohi log khud zaalim heñ¤

51.  Emaan waloñ ki baat to faqqat ye hoti hy k jab onheñ Allah aur Us k Rasool (s.a.w.w) ki tarraf bulaya jata hy ta k Wo on k darmeyaan faisla farmaey to wo yehi kuchh kahaiñ k ham ny sun lia, aur ham (srapa) ata'at-paira ho gaey, aur aisy he log flaah pany waly heñ¤

52.  Aur jo shakhs Allah aur Us k Rasool (s.a.w.w) ki ata'at krta hy aur Allah sy darta aur Us ka taqwa ikhteyaar krta hy pus aisy he log muraad pany waly heñ¤

53.  Aur wo log (yani Munaafiqeen) Allah ki barhi bhaari (takeedi) qasmeñ khaty heñ k aggar Aap (s.a.w.w) onheñ Hukam deñ to wo (Jahaad k liye) zaroor nikleñ gy, Aap (s.a.w.w) farma deñ k tum qasmeñ matt khao (balky) ma'roof treeqa sy farmaañbardari (darkaar) hy, baishak Allah on kaamoñ sy khoob aagaah hy jo tum krty ho (yani Allah tumhari zubani ata'at aur amli mukhaalifat ko khoob jaanta hy)¤

54.  Farma deejiye: Tum (sidq-e-dil sy) Allah ki ata'at kro aur Rasool (s.a.w.w) ki ata'at kro, phir aggar tum ny (Rasool s.a.w.w ki ata'at) sy roo-gardani ki to (jaan lo k is meiñ On ka kuchh zarrar naheeñ balky) Rasool (s.a.w.w) k zimma wohi kuchh hy jo On par laazim kia gea (yani Deen ki Tableegh aur Ahkaam-e-Elahi ka pohncha daina, us ko Rasool s.a.w.w ny ach'chi tarrah adaa kr dia aur Wo Apny Farz sy uhda-braa ho chukky) aur tumhary zimma wo hy jo tum par laazim kia gea hy (yani Rasool s.a.w.w ki ata'at-o-farmaañbardari), aur aggar tum On ki ata'at kro gy to Hadaayat pa jao gy, aur Rasool (s.a.w.w) par (Ahkaam ko) sreehan pohncha dainy k siwa (kuchh laazim) naheeñ hy (Chunañchy Rasool s.a.w.w ny Ahkaam ko bohut waazeh tor par pohncha dia)¤

55.  Allah ny aisy logoñ sy wa'da farmaya hy, (jis ka eefa aur ta'meel Ummat par laazim hy), jo tum meiñ sy Emaan laey aur Naik ammal krty rahy (Aap s.a.w.w ny Wahi naazal hony sy 13 saal tak Apny As'haab k saath Makkah meiñ qeyaam farmaya aur Kuffaar ki eezaoñ par sabr kia phir Hijrat-e-Madina k baad bhi As'haab har waqt khatry meiñ rehty. Aik roz aik Sahaabi ny farmaya: Kabhi aisa bhi zmana aey ga k hammeñ amman mu'yassar ho ga, is par ye Aayat naazal hui k) Wo (Allah) zaroor inhi (Musalmanoñ) ko zmeen meiñ Khilaafat (yani amaanat-e-iqtdaar ka haq) ataa farmaey ga jaisa k Us ny on logoñ ko (haq-e) hakoomat bakhsha tha jo in sy pehly thy (jaisy Da'ood a.s aur Suleman a.s waghaira aur jaisy Misr-o-Shaam k hukmranoñ ko hlaak kr k Bani-Israeel ko Khilaafat di) aur in k liye in k Deen (yani Islam) ko jisy Us ny in k liye pasand farmaya hy (ghalba-o-iqtdaar k zarriye) mazboot-o-mustehkam farma dy ga aur Wo zaroor (us tamakkan k baes) in k pichhly khof ko (jo in ki seyaasi, muaashi aur smaaji kmzori ki wajja sy tha) in k liye amn-o-hifaazat ki haalat sy baddal dy ga, wo (bay-khof ho kr) Meri ibaadat kreñ gy Mery saath kisi ko shreek naheeñ thehraeñ gy (yani sirf Mery Hukam aur Nizaam k taaby' raheñ gy chunañchy ye wa'da poora huwa aur sar-zmeen-e-Arab sy Kuffaar mita diye gaey aur Mashriq-o-Maghrib k mamaalik Allah ny Musalmanoñ k liye fattah kraey aur dunia meiñ on ka rob chha gea), aur jis ny is k baad na-shukri (yani Mery Ahkaam sy inharaaf-o-inkaar) ko ikhteyaar kia to wohi log faasiq (o-nafarmaan) hoñ gy¤

56.  Aur tum Namaz (k nizaam) ko qaem rak'kho aur Zakaat ki adaegi (ka intizaam) krty raho aur Rasool (s.a.w.w) ki (mukammal) ata'at bjaa lao ta k tum par Rehem kia jaey (yani ghalba-o-iqtdaar, istehkaam aur amn-o-hifaazat ki Naimtoñ ko barqaraar rak'kha jaey)¤

57.  Aur ye kheyaal har-giz na krna k inkaar-o-nashukri krny waly log zmeen meiñ (apny hlaak kiye jany sy Allah ko) aajiz kr deñ gy, on ka thikana Dozakh hy, aur wo bohut he bura thikana hy¤

58.  Ay Emaan walo! Chaahye k tumhary zair-e-dast (ghulaam aur baañdiyaañ) aur tumhary he wo bach'chy jo (abhi) jawaan naheeñ huwy (balky abhi qreeb-e-bloogh heñ, tumhary paas aany k liye) 3 mawaaqy'  par tum sy ijaazat lia kreñ, (aik) Namaz-e-Fajr sy pehly (k shab-khwaabi ka libaas tabdeel krny ka waqt hy) aur (dusry) dopehr k waqt jab tum (aaraam k liye) kaprhy utaarty ho (aur teh-bnd baandh laity ho) aur (teesry) Namaz-e-Isha k baad (jab tum khwaab-gahoñ meiñ chally jaty ho k baidari ka libaas tabdeel krny ka waqt hy), (ye) 3 (waqt) tumhary pardy k heñ, in (oqaat) k elawa na tum par koi gunaah hy aur na on par, (q k baq'ya oqaat meiñ wo) tumhary haañ kasrat k saath aik dusry k paas aaty jaty rehty heñ, isi tarrah Allah tumhary liye Aayateñ waazeh farmata hy aur Allah khoob jaan'ny wala Hikmat wala hy¤

59.  Aur jab tum meiñ sy bach'chy hadd-e-bloogh ko pohnch jaeñ to wo (tumhary paas aany k liye tmaam oqaat meiñ) ijaazat lia kreñ jaisa k in sy pehly (deegar baaligh afraad) ijaazat laity rehty heñ. Is tarrah Allah tumhary liye Apny Ahkaam khoob waazeh farmata hy, aur Allah khoob ilm wala aur Hikmat wala hy¤

60.  Aur wo boorhi khana-nasheen aurteñ (jin ki olaad hony ki ummar na rahi aur peerana-sali k baes) jinheñ (ab) Nikaah ki khwahesh naheeñ rahi on par is baat meiñ koi gunaah naheeñ k wo apny (oopar sy dhaañmpny waly izaafi) kaprhy utaar leñ bashartyky wo (bhi) apni aaraesh ko zaahir krny wali na banneñ (aur baal, seena, pindli waghaira na kholeñ), aur aggar wo (mzeed) par'haizgari ikhteyaar kreñ (yani zaed orhny waly kaprhy bhi na utaareñ) to on k liye behtar hy, aur Allah khoob sun'ny wala jaan'ny wala hy¤

61.  (Andhy, apaahaj aur bimaar log tañdrustoñ k saath khana khany sy bachty k kaheeñ kisi ko nafrat na ho, is par farmaya gea k) Andhy par koi rakaawat naheeñ aur na lañgrhy par koi harj hy aur na bimaar par koi gunaah hy aur na khud tumhary liye (koi muzaeqa hy) k tum apny gharroñ sy (khana) kha lo ya apny baap-dada k gharroñ sy ya apni maoñ k gharroñ sy ya apny bhaiyoñ k gharroñ sy ya apni behnoñ k gharroñ sy ya apny chachaoñ k gharroñ sy ya apni phoophiyoñ k gharroñ sy ya apny mamoo'on k gharroñ sy ya apni khalaoñ k gharroñ sy ya jin gharroñ ki kuñjiyaañ tumhary ikhteyaar meiñ heñ (yani jin meiñ on k maalikoñ ki tarraf sy tumheñ har qissam k tasarraf ki ijaazat hy) ya apny dostoñ k gharroñ sy (khana kha lainy meiñ muzaeqa naheeñ), (Qabeela Banni-Lais-bin-Umro k log tanha baghair mehmaan k khana na khaty thy. Kabhi kabhi mehmaan na milta to subbah sy shaam tak khana liye baithy rehty, is par farmaya gea k) tum par is baat meiñ koi gunaah naheeñ k tum sb k sb mil kr khao ya alag alag, phir jab tum gharroñ meiñ daakhil huwa kro to apny (ghr waloñ) par Salaam kaha kro (ye) Allah ki tarraf sy ba-Barkat Pakeeza Duaa hy, is tarrah Allah Apni Aayatoñ ko tumhary liye waazeh farmata hy ta k tum (Ahkaam-e-Sharee'at aur aadaab-e-zindagi ko) sammajh sakko¤

62.  Emaan waly to wohi log hen jo Allah par aur Us k Rasool (s.a.w.w) par Emaan ly aey heñ aur jab wo Aap (s.a.w.w) k saath kisi aisy (ijtmai) kaam par haazir hoñ jo (logoñ ko) yakja krny wala ho to wahaañ sy chally na jaeñ (yani Ummat meiñ ijtmai'yat aur wahdat paida krny k ammal jaisy k Jahaad aur tadbeer-e-jañg aur Jumma-o-Eidain waghaira meiñ dil-jammi sy shreek hoñ) jab tak k wo (kisi khaas uzzar k baes) Aap (s.a.w.w) sy ijaazat na ly leñ, (Ay Rasool-e-Mu'azzam s.a.w.w) baishak jo log (Aap s.a.w.w he ko Haakim aur Marja' sammajh kr) Aap (s.a.w.w) sy ijaazat tallab krty heñ wohi log Allah aur Us k Rasool (s.a.w.w) par Emaan rakhny waly heñ (k on ka ijaazat chaahna nishan-e-farmaañ-bardaari aur dleel-e-sehat-e-Emaan hy), phir jab wo Aap (s.a.w.w) sy apny kisi kaam k liye (jany ki) ijaazat chaheñ to Aap (s.a.w.w Haakim-o-Mukhtaar heñ) on meiñ sy jisy chaheñ ijaazat mar'hamat farma deñ aur on k liye (Apni Majlis sy ijaazat ly kr jany par bhi) Allah sy bakhshish maañgeñ (k kaheeñ itni baat par bhi grift na ho jaey, is sy maa'loom huwa k afzal yehi hy k haazir raheñ aur ijaazat tallab na kreñ), baishak Allah barha bakhshny wala nehaayat Mehrban hy¤

63.  (Ay Musalmano) Tum Rasool (s.a.w.w) k bulany ko aapas meiñ aik dusry ko bulany ki misl qraar na do (jab Rasool-e-Akram s.a.w.w ko bulana tumhary baahmi bulawy ki misl naheeñ to khud Rasool s.a.w.w ki Zaat-e-Grami tumhari misl kaisy ho sakti hy), baishak Allah aisy logoñ ko (khoob) jaanta hy jo tum meiñ sy aik dusry ki aarh meiñ (Darbaar-e-Risaalat s.a.w.w sy) chupky sy khissak jaty heñ, pus wo log darreñ jo Rasool (s.a.w.w) k Amr (e-Addab) ki khilaaf-warzi kr rahy heñ k (dunia meiñ he) onheñ koi aafat aa pohnchy gi ya (Aakhirat meiñ) on par dard-naak azaab aan parhy ga¤

64.  Khabbar-daar! Jo kuchh aasmanoñ aur zmeen meiñ hy (sb) Allah he ka hy, wo yaqinan jaanta hy jis haal par tum ho (Emaan par ho ya Munaafiqat par), aur jis Din log Us ki tarraf (Jazaa k liye) lotaey jaeñ gy to Wo onheñ bta dy ga jo kuchh wo kia krty thy, aur Allah har cheez ko khoob jaan'ny wala hy¤ <LAST AAYAT OF SURAH AN-NOOR>

Surah AN-NOOR ka Tarjuma (December 26, 2013 to February 3, 2014) 40 din meiñ mukammal huwa.  Surah AN-NOOR Madni Surah hy. SURAH AN-NOOR ki tafseel ye hy.

Ruku : 09

Para  : 18 (Ruku 07 to 18)

Aayaat    :    64